ឯកឧត្តម ជា ចំណាន ដឹកនាំកិច្ចប្រជុំអនុគណៈកម្មការពិធីការ និងបដិសណ្ឋារកិច្ចត្រៀមរៀបចំប្រារព្ធខួបលើកទី១៩ ទិវាអតីតយុទ្ធជន និងនិវត្តជនកម្ពុជា

1 ឧសភា 2026

1 នាទីអាន

នារសៀលថ្ងៃទី៣០ ខែមេសា ឆ្នាំ២០២៦ ឯកឧត្តម ជា ចំណាន រដ្ឋលេខាធិការក្រសួងសង្គមកិច្ច អតីតយុទ្ធជន និងយុវនីតិសម្បទា និងជាប្រធានអនុគណៈកម្មការពិធីការ និងបដិសណ្ឋារកិច្ច និងមានការអញ្ជើញចូលរួមពី ឯកឧត្តម ឈៀ ស៊ីដារ៉ា រដ្ឋលេខាធិការក្រសួងសង្គមកិច្ច អតីតយុទ្ធជន និងយុវនីតិសម្បទា និងជាអគ្គលេខាធិការរង សមាគមអតីតយុទ្ធជន និងនិវត្តជនកម្ពុជា បានដឹកនាំក្រុមការងារ អ.ន.ក. ចូលរួមកិច្ចប្រជុំរបស់អនុគណៈកម្មការពិធីការ និងបដិសណ្ឋារកិច្ចសម្រាប់ត្រៀមរៀបចំកម្មវិធីប្រារព្ធខួបលើកទី១៩ ទិវាអតីតយុទ្ធជន និងនិវត្តជនកម្ពុជា។

កិច្ចប្រជុំមានការអញ្ជើញចូលរួមពីថ្នាក់ដឹកនាំក្រសួងថ្នាក់ដឹកនាំក្រសួងសង្គមកិច្ច អតីតយុទ្ធជន និងយុវនីតិសម្បទា គណៈជំនាញ អ.ន.ក.ពាក់ព័ន្ធ និងថ្នាក់ដឹកនាំ មន្ត្រីនាយកដ្ឋានជំនាញ។

កិច្ចប្រជុំបានពិនិត្យ និងពិភាក្សាលម្អិតលើស្ថិតិរបស់សមាសភាពដែលនឹងត្រូវអញ្ជើញចូលរួមក្នុងកម្មវិធី ព្រមទាំងពិនិត្យ និងកែសម្រួលលើលិខិតអញ្ជើញ ប័ណ្ណសម្គាល់សមាជិក ការផលិត និងការបោះពុម្ភផ្សេងៗ ដើម្បីបម្រើឱ្យដំណើរការនៃការរៀបចំខួបលើកទី១៩ ទិវាអតីតយុទ្ធជន និងនិវត្តជនកម្ពុជាឲ្យប្រកបដោយជោគជ័យ៕