អ.ន.ក. រាជធានីភ្នំពេញ ដឹកនាំកិច្ចប្រជុំពង្រឹងការងារផ្តល់ថវិកាបេឡាមរណសង្គ្រោះជូនសមាជិក

កាលពីថ្ងៃទី២៣ ខែមករា ឆ្នាំ២០២៦ លោកឧត្តមសេនីយ៍ទោ យ៉ែម នៅ ស្នងការរង ទទួលផែនការងារធនធានមនុស្ស តំណាង លោកឧត្តមសេនីយ៍ឯក ជួន ណារិន្ទ អគ្គស្នងការរង ស្នងការនគរបាលរាជធានីភ្នំពេញ និងជាអនុប្រធាន អ.ន.ក. រាជធានីភ្នំពេញ និងលោក រ័ត្ន សុរិបូរ ប្រធានសាខាមូលនិធិជាតិជំនួយសង្គម រាជធានីភ្នំពេញ អញ្ជើញដឹកនាំកិច្ចប្រជុំណែនាំឯកសារលិខិតគតិយុត្តរបស់សមាគម ព្រមទាំងជំរុញការអនុវត្តការងារជំនាញផ្សេងៗរបស់អ.ន.ក. រាជធានីភ្នំពេញ ដល់លោក-លោកស្រី អធិការរងទទួលការងារ អ.ន.ក.ខណ្ឌទាំង១៤ និងលោក-លោកស្រី ប្រធានការិយាល័យសង្គមកិច្ច និងសុខុមាលភាពសង្គមខណ្ឌទាំង១៤។

កិច្ចប្រជុំនេះបានដាក់​ចេញទិសដៅអនុវត្ត ដូចជា ពង្រឹងការអនុវត្តការងារបេឡាមរណសង្គ្រោះជូនគ្រួសារសព, គណៈកម្មាធិការ អ.ន.ក.ខណ្ឌ ត្រូវសហការជាមួយការិយាល័យស.អ.យ.ខណ្ឌ ពិនិត្យផ្ទៀងផ្ទាត់ទិន្នន័យស្ថិតិអតីតយុទ្ធជនដែលជាសមាជិក អ.ន.ក. ឱ្យបានត្រឹមត្រូវ និងម៉ត់ចត់, គណៈកម្មាធិការ អ.ន.ក.ខណ្ឌទាំង១៤ ត្រូវធ្វើបច្ចុប្បន្នភាពសំណុំឯកសារថ្មី របស់សមាជិក អ.ន.ក. និង គណៈកម្មាធិការ អ.ន.ក.ខណ្ឌទាំង១៤ ត្រូវស្នើសុំតែងតាំងសមាសភាពលេខាធិការដ្ឋាន អ.ន.ក.ខណ្ឌទាំង១៤ និងក្រុមការងារជំនាញ ទាំង៤ របស់លេខាធិការដ្ឋាន អ.ន.ក.ខណ្ឌទាំង១៤ផងដែរ។