សម្តេច ម៉ែន សំអន អញ្ជើញ ថ្វាយ-ប្រគេន សៀវភៅ «ពុទ្ធិកវិទ្យាល័យព្រះសុរាម្រឹត ១១១ឆ្នាំ» ចំនួន ២៥០០ក្បាល និងទេយ្យទានជូនគណៈសង្ឃមហានិកាយនៅវត្តបទុមវត្តីរាជវរារាម | អត្ថបទ

សម្តេចកិត្តិសង្គហបណ្ឌិត ម៉ែន សំអន ឧត្តមប្រឹក្សាផ្ទាល់ព្រះមហាក្សត្រ អញ្ជើញថ្វាយ-ប្រគេន សៀវភៅ «ពុទ្ធិកវិទ្យាល័យព្រះសុរាម្រឹត ១១១ ឆ្នាំ» ចំនួន ២៥០០ក្បាល ចំណាយថវិកាអស់ ២០,០០០ ដុល្លារ ព្រមទាំងត្រៃចីវរ ទៀន វស្សា ទេយ្យវត្ថុ ជាសទ្ធាទានដ៏ថ្លៃថ្លារបស់ សម្តេចអគ្គមហាសេនាបតីតេ ជោ ហ៊ុន សែន និងសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន ដែលផ្ដល់ជូនតាមរយៈឯកឧត្តមអ្នកឧកញ៉ា ម៉ម វណ្ណឌី ទីប្រឹក្សាសម្តេចតេជោ ហ៊ុន សែន និងជាអនុប្រធានសមាគមអតីតយុទ្ធជន និងនិវត្តជនកម្ពុជា និងលោកជំទាវ អ្នកឧកញ៉ា ទៀង ផល្លា ព្រមទាំងបុត្រាបុត្រី

ជូនគណៈសង្ឃមហានិកាយ ក្រោមព្រះរាជាអធិបតីភាព សម្តេចព្រះមហាសុមេធាធិបតីកិត្តិបណ្ឌិត អំ លឹមហេង សម្តេចព្រះសង្ឃនាយកគណៈមហានិកាយ នៃព្រះរាជាណាចក្រកម្ពុជា នារសៀល ថ្ងៃចន្ទ ទី១៣ ខែកក្កដា ឆ្នាំ២០២៦ នៅឧបដ្ឋានសាលា វត្តបទុមវត្តីរាជវរារាម ស្ថិតក្នុងសង្កាត់ចតុមុខ ខណ្ឌដូនពេញ រាជធានីភ្នំពេញ។

ពិធីធម្មទាននេះមានការយាង និមន្ត និងអញ្ជើញចូលរួមពីសម្តេចព្រះសង្ឃនាយករង សម្តេចសង្ឃ ព្រះសង្ឃនាយកនៃពុទ្ធិកវិទ្យាល័យព្រះសុរាម្រឹត ព្រះសង្ឃ, ឯកឧត្តម ចាយ បូរិន រដ្ឋមន្ត្រីក្រសួងធម្មការ និងសាសនា, ឯកឧត្តមអ្នកឧកញ៉ា ម៉ម វណ្ណឌី ទីប្រឹក្សា សម្តេចតេជោ ហ៊ុន សែន និងជាអនុប្រធានសមាគមអតីតយុទ្ធជន និងនិវត្តជនកម្ពុជា និងលោកជំទាវ អ្នកឧកញ៉ា ទៀង ផល្លា ព្រមទាំងឯកឧត្តម លោកជំទាវ លោក លោកស្រី និងពុទ្ធបរិស័ទជាច្រើនរូបផ្សេងទៀត។

ក្នុងពិធីធម្មទាននេះ សម្តេចព្រះមហាសុមេធាធិបតីកិត្តិបណ្ឌិត អំ លីមហេង ទ្រង់ព្រះរាជទានសៀវភៅជូន សម្តេចកិត្តិសង្គហបណ្ឌិត ម៉ែន សំអន, ឯកឧត្តម ចាយ បូរិន រដ្ឋមន្ត្រីក្រសួងធម្មការ និងសាសនា និងព្រះរាជទានប័ណ្ណថ្លែង អំណេរគុណជូនចំពោះ ឯកឧត្តមអ្នកឧកញ៉ា ម៉ម វណ្ណឌី និងលោកជំទាវ អ្នកឧកញ៉ា ទៀង ផល្លា ដែលបានឧបត្ថម្ភនូវធម្មទានដើម្បីចែកផ្សាយដល់គ្រឹស្ថានពុទ្ធិកសិក្សាទូទាំងប្រទេស និង តម្កល់ទុកតាមបណ្ណាល័យ នានាទុកជាប្រយោជន៍សាធារណជនសិក្សាស្រាវជ្រាវ និងទុកជាឯកសារគោលសម្រាប់ ចងក្រង ប្រវត្តិពុទ្ធិកសិក្សានៅប្រទេសកម្ពុជា នាពេលអនាគត។

ក្នុងឱកាសនោះ សម្តេចកិត្តិសង្គហបណ្ឌិត ម៉ែន សំអន, ឯកឧត្តម ចាយ បូរិន, ឯកឧត្តមអ្នកឧកញ៉ា ម៉ម វណ្ណឌី និងលោកជំទាវអ្នកឧកញ៉ា ទៀង ផល្លា ក៏បានអញ្ជើញប្រគេន/ជូន «សៀវភៅពុទ្ធិកវិទ្យាល័យព្រះសុរាម្រឹត ១១១ឆ្នាំ» និងបច្ច័យដល់ព្រះសង្ឃ គណៈគ្រប់គ្រង លោកគ្រូ អ្នកគ្រូ សរុប១៩៨ អង្គ/នាក់ដែលបានមកចូលរួមក្នុងពិធី។

ចំពោះទេយ្យទានសម្រាប់ថ្វាយ និងប្រគេន សម្ដេចព្រះសង្ឃរាជ និងព្រះសង្ឃ ក្នុងពិធីធម្មទាននេះ ដោយក្នុងមួយអង្គៗ រួមមាន៖ ទៀនវស្សា ១ គូ, ត្រៃចីវរ ១ ត្រៃ, ទឹកសុទ្ធចំនួន ១០ កេស, ទឹកក្រូចចំនួន ១០ កេស, អង្ករ ២៥គីឡូក្រាម ចំនួន ១០ បេ, មី ចំនួន ១០ កេស, ទឹកត្រី ចំនួន ១០ យួរ, ទឹកស៊ីអ៊ីវ ចំនួន ១០ យួរ ព្រមទាំងទេយ្យវត្ថុបន្ថែមសម្រាប់ព្រះរាជាគណៈអមចំនួន ៨ព្រះអង្គ ក្នុងមួយព្រះអង្គទទួលបានសំពត់ចីវរ ចំនួន ១ លៀង។

បន្ថែមលើបច្ច័យបោះពុម្ពសៀវភៅចំនួន ២៥០០ក្បាល បច្ច័យ និងអំណោយទាំងអស់ក្នុងពិធី ធម្មទាននេះ ឯកឧត្តមអ្នកឧកញ៉ា ម៉ម វណ្ណឌី និងលោកជំទាវ អ្នកឧកញ៉ា ទៀង ផល្លា ក៏បានចូលបច្ច័យចំនួន ១០ ,០០០ ដុល្លារសហរដ្ឋអាមេរិកបន្ថែម សម្រាប់វត្ត និង គណៈគ្រប់គ្រងវត្តបទុមវតី ជាវកៅអីសម្រាប់ទុកប្រើប្រាស់ក្នុងកិច្ចពិធីសាសនាផ្សេងៗ នៅក្នុងវត្តផងដែរ៕