ព្រះរាជឱង្ការរបស់ព្រះករុណា ព្រះបាទសម្តេចព្រះ នរោត្តម សីហនុ"ព្រះបរមរតនកោដ្ឋ” ចារទុកជាប្រវត្តិសាស្រ្តជូនប្រជានុរាស្រ្តជនរួមជាតិ

១. ជនរួមជាតិជាទីស្នេហា !

ក្នុងជីវភាពប្រទេសជាតិនីមួយៗ គ្មានអ្វីឲ្យមានតម្លៃជាងឯករាជ្យទេ ព្រោះឯករាជ្យជាមូលដ្ឋាននៃសេចក្តីថ្លៃថ្នូរ និងសុភមង្គលទាំងឡាយដទៃទៀត។

អាវុធសំខាន់ជាងគេសម្រាប់កសាង និងការពារឯករាជ្យ និងអនាគតយើង ពុំមែនគ្រឿងយោធបរិក្ខារដ៏ស្តួចស្តើង គួរឲ្យវេទនារបស់កងទ័ពយើងនោះទេ។ អាវុធនោះគឺ ការរួបរួមចងបាច់គ្នាជាធ្លុងមួយនៃយើងនេះឯង។

ខ្ញុំជឿជាក់ថា ការរួបរួមរបស់យើងជាធ្លុងមួយនេះនឹងជួយស្រោចស្រង់ប្រទេសយើង និងឯករាជ្យយើងឲ្យឆ្លងសមុទ្រគ្រោះថ្នាក់ដែលមាននៅមុខយើងនេះបានផុតស្រឡះដោយជ័យមង្គល។

ជយោ កម្ពុជាឯករាជ្យ !

ភ្នំពេញ ថ្ងៃទី ០៩ ខែវិច្ឆិកា ឆ្នាំ១៩៦២

២. សូមបងប្អូនប្រជារាស្ត្រ កូនចៅ ចៅទួត ចៅលូត សាមគ្គីជាធ្លុងមួយ រួមរស់ជាមួយគ្នា ពួតដៃគ្នាកសាងជាតិ ដើម្បីកម្ពុជាប្រាសចាកជាដាច់ខាតពី ភាពទន់ខ្សោយ ឈានទៅកាន់ភាពរុងរឿងក្នុងពិភពលោក។ ទាំងនេះបង្ហាញពិភពលោកថា កម្ពុជារួបរួមគ្នាល្អណាស់ក្នុងសន្តិភាព ឯករាជ្យ កសាងជាតិគ្មានឈប់ឈរ។

ភ្នំពេញ ថ្ងៃទី៣០ ខែតុលា ឆ្នាំ២០១១