លោកជំទាវ ទុយ សិរីរតនៈ នេត្រភក្ត្រា អញ្ជើញចុះសួរសុខទុក្ខនិវត្តជនដែលជាអតីតមន្ត្រីរាជការក្រសួងព័ត៌មាន

លោកជំទាវ ទុយ សិរីរតនៈ នេត្រភក្ត្រា ប្រធានកិត្តិយសសាខាសមាគមនារីកម្ពុជា ដើម្បីសន្តិភាព និងការអភិវឌ្ឍ ក្រសួងព័ត៌មាន តំណាងឯកឧត្តម នេត្រ ភក្ត្រា រដ្ឋមន្ត្រីក្រសួងព័ត៌មាន និងជាប្រធានគណៈកម្មាធិការសមាគមអតីតយុទ្ធជន និងនិវត្តជនកម្ពុជាវិស័យព័ត៌មាន រអមដំណើរដោយ លោក​ជំទាវ​ សន ម៉ារ៉ាដា រដ្ឋលេខាធិការ​ និង​ជា​សមាជិក​ អ.ន.ក.វិស័យ​ព័ត៌មាន​​​, លោក​ លោកស្រី​ អនុប្រធាន​លេខា​ធិការ​ដ្ឋាន​ និងសមាជិក សមាជិកាលេខាធិការដ្ឋាន នៅព្រឹកថ្ងៃទី១៨​ ខែកញ្ញា​ ឆ្នាំ២០២៦នេះ បានអញ្ជើញចុះសួរសុខទុក្ខនិវត្តជនដែលជាអតីតមន្ត្រីរាជការបម្រើការងារនៅក្រសួងព័ត៌មាន ចំនួន ២រូបមានឈ្មោះ លោកស្រី​ ស៊ី​ គឹមយៀង​​ អតីតមន្ត្រីរាជការបម្រើការងារនៅអគ្គនាយកវិទ្យុជាតិកម្ពុជា (RNK) និងលោក​ គឹម​ សារ៉ុម​ អតីតមន្ត្រីរាជការបម្រើការងារនៅអគ្គ​លេខាធិការ​ដ្ឋាន​។

ក្នុងឱកាសអញ្ជើញចុះសួរសុខទុក្ខ លោកជំទាវ ទុយ សិរីរតនៈ នេត្រ ភក្ត្រា ក៏នាំយកប្រសាសន៍ផ្តាំផ្ញើសាកសួរសុខទុក និងអំណោយរបស់ ឯក​ឧត្តម ​នេត្រ ភក្ត្រា រដ្ឋមន្ត្រី​ក្រសួងព័ត៌មាន​ និងលោកជំទាវ​ ជូនអតីតមន្ត្រីរាជការទាំង២នាក់ រួមមាន អង្ករ ៣បេ, មី ២កេស, ត្រីខ ១កេសធំ, ទឹកសុទ្ធ ២កេសធំ, ទឹកត្រី ១យួរ, ទឹកស៊ីអ៉ីវ ១យួរ និងថវិកាចំនួន ២០ម៉ឺនរៀល។

ជាមួយគ្នានេះដែរ ក្រុមការងារ អ.ន.ក.វិស័យ​ព័ត៌មាន ក៏បានជម្រាបជូនដំណឹងអំពីការចុះឈ្មោះជាសមាជិកសមាគមនិវត្តជន ជូនដល់និវត្តជនទាំង២រូប ដើម្បីផ្សារភ្ជាប់ទំនាក់ទំនងឱ្យបានកាន់តែជិតស្និត និងទទួលបានការយកចិត្តទុកដាក់បន្ថែម។ ការចុះសួរសុខទុក្ខនេះ បានស្ដែងឱ្យឃើញពីការយកចិត្តទុកដាក់ និងការដឹងគុណចំពោះអតីតមន្ត្រីរាជការ ដែលបានខិតខំបំពេញភារកិច្ចបម្រើជាតិ ក្នុងវិស័យព័ត៌មាននាពេលកន្លងមក៕

រូបភាព​: AKP/ហុង ម៉េងឡុង