លោកជំទាវ ទុយ សិរីរតនៈ នេត្រភក្ត្រា អញ្ជើនាំយកអំណោយ និងចុះសួរសុខទុក្ខអតីតមន្ត្រីរាជការក្រសួងព័ត៌មាន ចំនួន ៣រូប

លោកជំទាវ ទុយ សិរីរតនៈ នេត្រភក្ត្រា ប្រធានកិត្តិយសសាខាសមាគមនារីកម្ពុជា ដើម្បីសន្តិភាព និងការអភិវឌ្ឍ ក្រសួងព័ត៌មាន តំណាង​ឯកឧត្ដម​ នេត្រ ភក្ត្រា រដ្ឋមន្ត្រីក្រសួងព័ត៌មាន និងជាប្រធាន អ.ន.ក.​ វិស័យព័ត៌មាន នៅថ្ងៃទី២០ ខែសីហា ឆ្នាំ២០២៦នេះ បានអញ្ជើញចុះសួរសុខទុក្ខនិវត្តជនដែលជាអតីតមន្ត្រីរាជការបម្រើការងារនៅក្រសួងព័ត៌មាន ចំនួន ៣រូប លោក ចាន់ សម្បត្តិ​ អតីតមន្ត្រីរាជការបម្រើការងារនៅអគ្គនាយកទីភ្នាក់ងារសារព័ត៌មានកម្ពុជា (AKP), លោកស្រី អ៊ុក សារ៉ាន អតីតមន្ត្រីរាជការបម្រើការងារនៅអគ្គនាយកវិទ្យុជាតិកម្ពុជា (RNK) និង លោក សក្តិ ស៉ីថន​ អតីតមន្ត្រីរាជការបម្រើការងារនៅអគ្គនាយកដ្ឋានទូរទស្សន៍ជាតិកម្ពុជា (TVK)។

ពិធីនេះក៏មានការអមដំណើរដោយ លោក​ជំទាវ​ សន ម៉ារ៉ាដា រដ្ឋលេខាធិការ​ និង​ជា​សមាជិក​ អ.ន.ក.វិស័យ​ព័ត៌មាន​​​, លោកជំទាវ​ ទេស ផល្លីន អគ្គលេខាធិការ ជាសមាជិក អ.ន.ក. វិស័យព័ត៌មាន និងជាប្រធានលេខាធិការដ្ឋាន អ.ន.ក. វិស័យព័ត៌មាន រួមទាំងសមាជិក សមាជិកាលេខាធិការដ្ឋាន។

ក្នុងឱកាសនោះ លោកជំទាវ ទុយ សិរីរតនៈ នេត្រភក្ត្រា បាននាំយកអំណោយរបស់ឯក​ឧត្តម ​នេត្រ ភក្ត្រា រដ្ឋមន្ត្រី​ក្រសួងព័ត៌មាន​ និងលោកជំទាវ​ ជូនអតីតនិវត្តជនទាំង៣រូបដែលម្នាក់ៗទទួលបានរួមមាន អង្ករ៣បេ, មី ២កេស, ត្រីខ១កេសធំ, ទឹកសុទ្ធ ២កេសធំ, ទឹកត្រី ១យួរ, ទឹកស៊ីអ៉ីវ ១យួរ និងថវិកាចំនួន ២០ម៉ឺនរៀល។

ជាមួយគ្នានេះដែរ ក្រុមការងារក៏បានជូនដំណឹងអំពីការចុះឈ្មោះជាសមាជិកសមាគមនិវត្តជន ជូនដល់និវត្តជនទាំងពីររូប ដើម្បីផ្សារភ្ជាប់ទំនាក់ទំនងឱ្យបានកាន់តែជិតស្និត និងទទួលបានការយកចិត្តទុកដាក់បន្ថែម។ ការចុះសួរសុខទុក្ខនេះ បានស្ដែងឱ្យឃើញពីការយកចិត្តទុកដាក់ និងការដឹងគុណចំពោះអតីតមន្ត្រីរាជការ ដែលបានខិតខំបំពេញភារកិច្ចបម្រើជាតិ ក្នុងវិស័យព័ត៌មាននាពេលកន្លងមក។

នាឱកាសនោះដែរ លោកជំទាវ​ ទុយ សិរីរតនៈ នេត្រភក្ត្រា ក៏បាននាំយកប្រសាសន៍ផ្តាំផ្ញើសាកសួរសុខទុក្ខពីសំណាក់​ ឯកឧត្ដម​ នេត្រ ភក្ត្រា ដែលជានិច្ចកាលតែងតែនឹករលឹកដល់គុណបំណាច់របស់និវត្តជនដែលបានចូលរួមចំណែកអភិវឌ្ឍវិស័យព័ត៌មាន និងសោតទស្សន៍នៅកម្ពុជា៕

រូបភាព​៖ ក្រសួងព័ត៌មាន/ឡុង​ ដេវីត